31. juli 2000 UKA 2000/12
Nassuiaatit nalinginnaasut
Inatsisip allanngortinnerani siunertarineqarpoq Kangerlussuup eqqaatalu kommuneqarfinnut agguataarinermut atalernissaa.
Nuna pineqartoq sakkutooqarfiunermi nalaani immikkut inissisimasimavoq, oktober 1992-imili sakkutooqarfiujunnaarpoq tamatumalu malitsigisaanik Inatsisartut aalajangerlutik nuna pineqartoq ukioq 2001-ip tungaanut kommunit aggornerisa avataanniitinneqarallassasoq.
Tamatuma nassataraa, Kangerlussuarmi innuttaasut Namminersornerullutik Oqartussat pisortaqarfiinit kiffartuunneqarnerat, nunaqqatigiillu siunnersuisoqatigiivi suliani aalajangersimasuni pisortaqarfiit sinnerlugit ingerlatsisinnaallutik. Kommunit assigalugit nunaqqatigiit siunnersuisoqatigiivi oqartussaaffilerneqarnikuunngillat. Kommunit allat assigalugit kommunimi attaveqarfissanik ingerlatsiveqanngilaq, aamma kommunini allanisuut assingusunik innuttaasunut neqerooruteqarani, soorlu aamma aqutseriaaseqarnermi innuttaasut qularnaariffigineqanngillat inuit oqartussaaqataaneranni pisinnaatitaaffinnik imaluunniit namminerlutik aqutsisinnaanermik.
Inatsimmi allannguutissatut siunnersuutit kingunerissavaat Kangerlussuup kommuneqarfiit killeqarfiisa atuuttooreersut iluaniilernissaa.
Kangerlussuup kommunimut ilanngunneqarnerata nalinginnaasumik aningaasatigut allaffissornikkullu Namminersornerullutik Oqartussanut kingunissai.Ikaarsaariarfimmi piffissami 1. januar 2001-imiit 31. december 2001-ip tungaanut Nunatta karsianut imaluunniit kommunip aningaasaqarneranut annertunerusumik aningaasatigut 2001-imi kinguneqassanngilaq. Taamaattoq nunaqqatigiit siunnersuisoqatigiivinut aningaasaliussat kommunip allaffissornikkut ingerlatsineranut aamma Kangerlussuarmi nunaqarfiup aqutsisuinut 1. maj 2001-imi nuunneqassapput.
Ullumikkut pissutsit ilisimaneqartut aallaavigalugit ukiumi aningaasaliiffiusumiit 2002-mi Nunatta karsiata akileraarutitigut isertitat ilanngaatit peereerlugit 25 mio. kr.-it missaat annaassavai. Akerlianilli maanna Kangerlussuarmi ingerlatsinermi ullumikkut aningaasartuutit atorneqartartut piissapput. Tamatumani ingerlatsinermi aningaasartuutini ilaapput allaffissornikkut ingerlatsinermi nukinnik atuineq, inatsisit toqqammavigalugit suliassani aningaasartuutit kiisalu annikinnerusumik Mittarfeqarfiit ingerlatsinikkut aningaasartuutaat, katillugit 10 mio. kr.-it missaanniittut, taamaalilluni Nunatta karsiata ilanngaatit peereerlugit isertitassat 15. mio. kr.-it missaat annaassavai.
Tamatuma saniatigut kommuninut ataatsimoortumik tapiissutit sunnerneqassapput, taakkulu isumaqatiginninniutigineqassapput, maannalu pissutsit tunngavigalugit allannguuteqartitsinissami kommunini nalimmassaalluni aaqqissuussinerit sunniuteqarfigissavai, imaalerluni 4,9 mio. kr.-it kommunit akornanni agguaassassanngussallutik.
Siunnersuummi aalajangersakkanut ataasiakkaanut nassuiaatit
§ 1, nr. 1-imut aamma 2-mut:
§ 4-mut innersuussutip atorunnaarsinnerata kiisalu § 5-ip atorunnaarsinnerata kingunerissavaat Kangerlussuup nunaqarfittut Sisimiut aamma Maniitsup kommuneqarfiisa killeqarfiisa inatsimmi atuuttut iluaniilernera. Kangerlussuarmi najugaqarfiusoq taamaalilluni Sisimiut Kommunianut ilanngutissaaq.
§ 2-mut:Siunnersuutigineqarpoq ikaarsaariarnermi aaqqissuussisoqarnissaa pissutigalugu inatsit januarip aallaqqaataani 2001-imi atuutilissasoq.
Allannguutit aningaasarsianit akileraarutit pillugit Inatsisartut inatsisaannut tunngasut ukioq aningaasarsiorfiusoq 2002 aallarnerfigalugu aatsaat atuutilissapput, aningaasarsianit akileraarutit pillugit Inatsisartut inatsisaat naapertorlugu. Tamanna allaffissornikkut ingerlatsinermut tunngatillugu ima isumaqarpoq, ukiumi aningaasarsiorfiusumi 2001-imi allaffissornikkut ingerlatsineq Akileraartarnermi Pisortaqarfimmiiginnassammat, soorlu assersuutigalugu ukioq 2001-imi aningaasarsianit akileraaruteqaataasussanik angissusiliineq Akileraartarnermi Pisortaqarfimmit isumagineqassaaq, siumoortumillu nalunaarsuineq kiisalu skattekortinik nassiussuineq Sisimiut kommuniata isumagissavaa. 2001 tikillugu ilanngullugulu akileraarutinit isertitat Nunatta karsianut nakkartassapput. Ukioq aningaasarsiorfiusoq 2002 ilanngullugu aallarnerfigalugu akileraarutitigut isertitat Sisimiut kommunianut nakkartalissapput.
§ 3-mut:Siunnersuutigineqarpoq inatsit januarip aallaqqaataani 2001-imi atuutilissasoq, Kangerlussuarmilu innuttaasut taamaalillutik 2001-imi upernaakkut kommuninut nunaqarfinnilu aqutsisunut qinersinernut qinerseqataalersinnaassallutik. Uanilu Kangerlussuarmi nunaqarfimmi aqutsisussanik qinersisoqassaaq, Sisimiut Kommuniata ataani inissisimasussamik. Nunaqqatigiit siunnersuisoqatigiivi qinersinissap tungaanut atuutissapput, 1. maj 2001-imi kommunalbestyrelsi nunaqarfimmilu aqutsisuni qinigaarlaat aallartinnissaasa tungaanut. Tamatuma kingorna Nunaqqatigiit siunnersuisoqatigiivi atuukkunnaassapput.
Kangerlussuarmili pisortat ingerlataannut allaffissornikkut ingerlatsineq aningaasatigullu akisussaaneq ukioq 2001 tamakkerlugu Namminersornerullutik Oqartussaniissaaq, aatsaallu Sisimiut kommunianut januarip aallaqqaataani 2002-imi allaffissornikkut ingerlatsineq aamma aningaasalersuineq tunniunneqassalluni, tassami ingerlatsinermut akisussaaffiup tunniunneqarnerani aningaasanut inatsimmut aamma kommunip missingersuutaanut tunngasut ukiumoortut qaammatisiutinik malitaqartut mianerisariaqarmata. Tamatuma kingorna Kangerlussuaq nunaqarfittut Sisimiut Kommunianut atasutut allaffissornikkut ingerlanneqalissaaq.
Naalakkersuisut isumagisaanni pingaarnersat tassaapput akilerartarnermut tunngasut, isumaginninnermut tunngasut, atuarfeqarnermut, sunngiffimmut kiisalu pinaveersaartitsinermut tunngasut. Aammattaaq avatangiisinut inuussutissarsiornermullu tunngasut kiisalu nunaminertanik atugassiisarnermut tunngasut. Inissiat allaffissornikkut ingerlanneqarneri Naalakkersuisut sinnerlugit Mittarfeqarfimmit isumagineqarpoq.
Inatsisitigut tunngavissaqarpoq, Naalakkersuisut Sisimiut Kommunianut piginnaatitsissumik tunniussinissaannut, ikaarsaarnissaq annertusiartuaartumik pissusissamisoortumillu pisinnaaqqullugu.